估你唔到呢4件事令小朋友瞓得差

估你唔到呢4件事令小朋友瞓得差!!!

#哺乳媽媽PERIOD

PERIOD嘅時候,媽媽奶量有機會下跌

(我自己會跌一半...)

如果你係全埋身媽媽

你PERIOD前或中期覺得小朋友突然好fussy

好大機會係佢食唔飽!

建議: 如果已加固,就要餵多啲固體

未加固,可能就要密密食

半夜亦有機會因而扎醒多咗~

記得PERIOD後要補充氣血,休息足夠,追返奶量啊~

#落雨

落雨嘅日子,大部份小朋友都要留响屋企

咁就少咗機會出街放電同曬太陽!

所以都可能令小朋友半夜瞓唔好!

如果夜晚落雨,有機會雨水會滴响窗邊

有啲對聲音敏感嘅小朋友半夜會因為聽到滴水聲而扎醒...

建議:响屋企都要有大肌肉嘅活動

可能要播一啲聲音去遮蓋滴水聲

#家長嘅情緒

你以為你小朋友感受唔到你嘅情緒?

小朋友都不知幾醒!

你緊張,佢都會緊張

大人唔識放鬆,小朋友都好難可以放鬆入睡

建議:媽媽都要有me time! 那怕只係15分鐘落街行個圈。尤其是全職媽媽!

唔係話唔負責任丟低佢比其他人照顧。而係媽媽有壓力都需要紓緩同排解!有時你會發現,只係少少嘅15分鐘,你返上屋企嘅一刻,你對住小朋友都會溫柔啲!

如果真係不能抽身出街,就臨瞓前浸個10分鐘嘅熱水浴或者做5分鐘冥想吧!

當然,教小朋友自己瞓,你都會慳返好多時間可以me time! 自己都會和顏悅色好多(不論對住老公定小朋友:P)!

#令人興奮嘅party

不論係有朋自遠方來定係生日派對,小朋友突然見到好多陌生人。而家聽到嘅聲音會比較大聲,亦容易見到一啲比較刺激嘅事物,都有機會夜晚瞓得差咗

尤其是係高敏感嘅小朋友!

建議: 不論party 前定後,都要同小朋友講,比定心理準備佢,希望減少心理上嘅刺激

仲有好多估你唔到嘅事都有機會令小朋友瞓得差!一齊做個有awareness嘅家長~見招拆招啦!